از
مزاح
باخبر ذرائع سے پتا چلا ہے کہ پاکستان میں اب تک پچاس ساٹھ افراد بلیو وہیل کا شکا ر بن چکے ہیں جن میں ایک بڑی تعداد خواتین کی بھی شامل ہے ۔حکومت کے دباو میں آکر میڈیا اس کی خبر تشہیر نہیں کر رہا تاکہ لوگوں میں خوف و ہراس نہ پھیلے ۔ان تمام نے پچاسویں ٹاسک میں جا کر زندگی کی بازی ہاری ہے ۔ مزید تفصیلات کے مطابق یہ بھی معلوم ہوا ہے کہ بلیو وہیل ہر آدمی کو آخری ٹاسک خود کشی کا نہیں دیتی ۔خود کشی کرنا یا موت کو گلے لگانا یہ دوسری چنوتی ہوتی ہے اگر گیم کھیلنے والابلیو وہیل کی طرف سے بتائے گئے پچاسویں ٹاسک کو پورا نہ کر سکے یا ایسا کرنے ہی سے انکار کر دے تب اسے خود کشی کا آپشن چننا پڑتا ہے ۔رپورٹ دینے والے نمائندے کے مطابق مرنے والی خواتین میں سے دو کو بلیو وہیل نے آخری ٹاسک یہ دیا تھا کہ اپنی صحیح عمر بتائیں اور انھوں نے یہ راز ظاہر کرنے کے بجائے دوسرے آپشن کا انتخاب کرلیا ۔جبکہ تین خواتین کو بغیر میک اپ کے اپنی تصویر فیس بک پر اپ لوڈ کرنے کا حکم ملا تھا۔ایک اور خاتون کوایک گھنٹا خاموش بیٹھے رہنے کا ٹاسک ملا تھا ۔جو اس نے قبول کر لیا ، پتا یہی چلا کہ وہ بیس منٹ بھی زندہ نہیں رہ پائی ۔چار لڑکیوں کو ایک ہفتے کے لیے فیس بک استعمال نہ کرنے کی ہدایت ملی تین تو دوسرے دن ہی اس جگہ پہنچ گئیں جہاں بلیو وہیل انھیں پہنچانا چاہتی تھی ۔چوتھی سخت جان تھی۔ اس نے کہیں چوتھے دن جا کر سسکتے سسکتے جان دی اور مرنے سے پہلے اپنا اکاو ¿نٹ اپ ڈیٹ کرنا نہ بھولی۔ایک خاتون کو چوبیس گھنٹوں کے لیے ساس کی فرماں برداری کا حکم ملا تھا۔سنا ہے وہ تو بچ گئی اس کی ساس کا خوشی سے ہارٹ اٹیک ہو گیا ہے ۔
گیم کھیلنے والوں میں تین شیخ بھی شامل تھے ۔ان سے بلیو وہیل نے سو سو روپے کا ایزی لوڈ مانگا اور باخبر ذرائع کے مطابق تینوں بہ مشکل ہی یہ ٹاسک پڑھ پائے تھے ۔اس کے بعد خودکشی یا ٹاسک پورا کرنے میں سے ایک بات چننے سے پہلے وہ انجام کو پہنچے۔ایک پٹھان کو نسوار چھوڑنے کا ٹاسک ملا اور اس نے بلیو وہیل کی بات کا جواب دینے کے بجائے کنپٹی پر پستول رکھ کر گولی چلا دی ۔ دو گجر بھی بلیو وہیل کا شکار ہوئے ہیں۔دونوں کو نہانے کا ٹاسک ملا تھا ۔چار کالج کے لڑکوں کو ایک ہفتہ تک گرلز کالج کے سامنے جا کر ”بھونڈی“ سے روکا گیا تھا ۔تین نے مینار پاکستان سے نیچے چھلانگ لگا دی اور چوتھے نے شرط منظور کر لی ۔اور تین دن آئی سی یو میں رہنے کے بعد اپنے ساتھیوں سے جا ملا۔دو لڑکوں کو یہ ٹاسک ملا کہ وہ ہفتہ بھر ایک وقت میں صرف ایک ہی لڑکی سے افیئر چلا سکتے ہیں ۔ایک تو یہ سن کر ہی فوت ہو گیا دوسرے کے بارے معلوم ہوا ہے کہ اس نے ٹرین کے نیچے لیٹ جانے کو ترجیح دی ۔
ٹین ایجز کے ساتھ بڑی عمر کے افراد بھی اس قاتل گیم کا شکار بنے ۔کچھ سیاست دانوں نے بھی یہ گیم کھیلنے کی کوشش کی ان میں سے دو کو آخری ٹاسک سچ بولنے کا ملا ۔غریب دوسرا سانس ہی نہ لے پائے ۔ جبکہ تین کو بلیو وہیل نے سورة اخلاص سنانے کا حکم دیا ۔تینوں اس وقت کوما میں ہیں ۔آثار یہی نظر آ رہے ہیں کہ وہ آج یا کل تک اپنے دو ساتھیوں سے جا ملیں گے ۔
کچھ سرکاری اہلکار بھی اس قاتل گیم کا شکار بنے ۔تین جج جن سے پچاسویں ٹاسک میں عدل و انصاف کرنے کا وعدہ لینے کی کوشش کی گئی ۔کچھ پولیس والے جنھیں تا عمر رشوت نہ لینے کا حکم دیا گیا ۔دو آرمی کے جوان بھی ان میں شامل ہیں جنھیں اپنے سینئر کے حکم پر” نہیں سر“ کہنے کا ٹاسک ملا تھا ۔اور ان میں سے ایک بھی نہ بچ پایا۔
پانچ لاہوری بھی اس فہرست میں شامل ہیں جنھیں گدھے کے گوشت سے پرہیز کی ہدایت ملی تھی۔تین میڈیا چینل کے مالکان بھی بلیو وہیل شروع کر بیٹھے ۔انھیں برما کے مسلمانوں کے بارے تازہ ترین صورت حال بتانے کا ٹاسک دیا گیا تھا ۔تینوں کی نماز جنازہ آج شام ان کی مقامی جنازہ گاہ میں ادا کی جائے گی ۔
آخر میں بڑی ہمت اورکوشش سے پاکستان کے کچھ سائنس دانوں اور ہائیکرزنے مل کر بلیو وہیل گیم قائم علی شاہ کے موبائل میں انسٹال کر دی اور تاحال بلیو وہیل غائب ہے ۔تازہ خبر ملتے ہی گمنام بابا پھر حاضر ہو گا اس وقت تک کے لیے اجازت ۔
